「老佛爺」駕到路氹！「賭王」何鴻燊旗下澳博（880）雖然啱啱失去澳門濠賭一哥嘅位置，俾金沙中國（1928）爬頭，但係冇影響到佢哋繼續積極發展位於路氹嘅新賭場項目「上葡京」，仲成功請到時裝界大師，人稱老佛爺嘅Karl Lagerfeld幫手，為日後重奪龍頭寶座鋪路。
全球首間 房數約270
澳博噚日宣佈，已經同Chanel創作總監Karl Lagerfeld傾掂咗，老佛爺亦會獻出佢嘅第一次，為澳博設計全球首間、樓高20層並設有約270間酒店房嘅KARL LAGERFELD酒店，成為上葡京項目嘅一部份。名媛、闊太對Chanel嘅時裝、手袋趨之若鶩，估唔到賭王四太梁安琪鍾意到，要搵老佛爺合作起酒店。
難得請得郁老佛爺幫手，身為澳博執董嘅四太亦都親自飛到巴黎同老佛爺簽約，港龍創辦人曹光彪嘅30歲孫女曹穎惠（Veronica），即係2012年底嫁咗畀家族開金礦嘅俄羅斯老公嗰位，𠵱家係Karl Lagerfeld大中華區董事，所以都有出席簽約儀式。
澳博作為最後一間登陸路氹嘅濠賭股，佢哋呢個上葡京項目，設有700張賭枱同埋合共2,000間酒店房，要去到2017年先可以開幕，遲過晒其他人，明顯係輸在起跑線上。
為急起直追，澳博已兩度將投資額加碼，希望整靚個場，引多啲賭客入場。除咗老佛爺，澳博早前已搵咗意大利著名時裝品牌Versace合作興建五星級酒店Palazzo Versace，引入身價不菲嘅外援幫手大打路氹戰。
李華華
mailto:[email protected]