兩會重點政策係更強化祖國電子訊息產業，連埋領導人前排講明要提高網絡安全，冠軍（092）食正呢啲瓣數，同時最吸引係集團PB得0.2倍，IT股當中，冇邊隻有咁殘，買定離手。
食正祖國政策
啱喺兩會前，以祖國領導人習近平為首嘅中央網絡安全和訊息化領導小組，召開會議，講明祖國要成為網絡強國，兼要提高網絡安全。
又啱舉行嘅兩會，總理李克強亦講明，繼續推動科技發展。
尤其呢一兩年，祖國電子消費、雲端、軟硬件等等，衍生對IT產業好大需求，加埋阿爺力撐，照計繼續好景。而冠軍啱公佈去年12月底止半年業績，祖國收入高達21億銀，增長咗34%，兼佔總收入80%比重，冠軍食正祖國呢條水，已經掂過碌蔗。
再講，冠軍正積極拓展「保安解決方案」，兼夥拍國際夥伴，提供全面性綜合保安系統。呢壇製作，就正正食應習主席所講網絡安全問題，冠軍肥仔水。
冠軍半年純利4,700萬銀，增長26%，唔計減值9,850萬銀，實際純利係上到1.4億銀，相當靚仔。就算以減值後純利4,700萬銀做基礎，兼係咁意當冠軍下半年度純利，睇齊上半年度，全年度純利都講緊9,400萬銀，增長已經可以翻半番。
冠軍NAV 1.2元，現價（0.255元）PB得0.2倍，係場內PB最平嘅IT股。加上股份上到0.25元，之後每上一格，係以0.5仙計數，唔再矮仔爬樓梯，會快好多。
買冠軍，翻一番到0.5元，PB仍然得0.5倍。比對噚日又再嚟料嘅方正（418）及權智（601）（PB挨近1倍），仲係平一截。
錢雋
細價股專家
本欄逢周二、五刊出