【亂噏24 第34集】人稱靚靚的袁詠儀，擔任本周《亂噏24》嘉賓，她坦言當初揀張智霖（Chilam）做男友時「純粹睇樣」，熟絡後才慢慢發掘他的優點。坐擁Cool魔和兒子魔童的靚靚忙相夫教子，連做運動的時間也沒有。節目足本版逢周四晚上11時播出，讀者可在 http://bit.ly/appletalk24重溫。
撰文：馮國康、Sidekick
不說不知，黎智英（肥佬黎）跟袁詠儀見過很多次面，首次碰巧又是在壹傳媒大樓，但已是十多年前的事，肥佬黎憶述：「我同啲同事講話呢個女仔好掂，咁細個就咁有自信，唔係裝出嚟。有次你見到我仲大叫『肥佬黎』！」靚靚不敢相信當日如此大膽。肥佬黎續說：「我見你咁靚女，梗係想走去（抱抱），但我越想就越唔敢！所以好怕醜咁走咗。」蔡瀾認識靚靚則是拍攝電影《霹靂火》，他說：「唔淨只戲裏面係咁嘅人，本身都係咁嘅人，周圍撩工作人員同開玩笑。」靚靚笑指自己非常爛玩，當年恃着有無窮精力，便四圍撩事鬥非，亦因而鍛煉了膽量。
靚靚是港姐冠軍，是圈中公認的靚女，肥佬黎問她是否從小就覺得自己生得靚？靚靚答：「咁又唔係。我個妹個樣鬼鬼哋，所以由細到大個個都讚佢靚，冇乜人會讚我。」靚靚表示兩姊妹都有點「鬼鬼哋」，曾懷疑過祖宗是「外族」，她說：「但我唔敢問，驚俾人打。冇理由問阿嫲係咪雜雜哋？」
扮清純怕丟架
坊間常說漂亮女人多數會選相貌平庸的老公，因為較有安全感，陳淑莊（Tanya）問靚靚揀Chilam時可有考慮這點？靚靚坦言當初沒考慮這麼遠，只是直覺認為對方適合自己：「第一眼一定係靚仔，傾落偈又覺得OK喎，有啲智慧，有啲EQ，有啲內涵。因為呢個圈好多靚仔，你同佢講兩句嘢就會知道得個殼。」靚靚記得與Chilam剛剛拍拖時，身邊好友都反對，認為靚仔冇本心。周潤發妻子甚至叮囑她小心點，靚靚當時對發嫂說：「你畀啲時間識吓呢個人（Chilam），隨時你會鍾意佢多過鍾意我。」
「Cool魔」Chilam去年做過《亂噏24》嘉賓，肥佬黎對其甚有好感，節目上三番四次在靚靚面前讚他，又認為靚靚相當幸運，可以嫁給一個好老公，不計較她的任何過去。靚靚說：「我覺得有啲嘢我做過，我唔會唔認。」Tanya最敬佩靚靚能坦言面對自己過去，她說：「尤其是女仔，好鍾意扮到懶清純。」靚靚說：「我又唔得，無謂搵架嚟丟啦，終有一個人指控你咪仲核突。」肥佬黎認同做人要懂得面對過去：「最緊要自己feel comfortable，如果你承擔咗過去，過去就成為你嘅財產。有咗過去，我哋會堅強咗同有咗智慧。」
肥佬黎曾多次提到想去滾，只是每次都係得個想字，因為每想到會破壞幸福家庭便會勒停。蔡瀾認為他只是未遇到一位能令他放棄一切的女人，肥佬黎不認同：「有遇過，但你即刻諗到後果。」
肥佬黎自爆當年遇上一位導演，她在法國拍電視，每見到她都會心跳加速，他說：「第一日心跳，第二日又心跳，到第三日我disappear，因為再咁落去，我就唔會理後果。」靚靚笑說應該跟Chilam說這番話，肥佬黎又再讚Chilam：「我覺得你老公唔係一個唔負責任嘅男人。」靚靚笑說：「好啦，今晚畀餐飽飯佢食啦！」
減磅抗拒整容
靚靚是兩屆香港電影金像獎影后，當年與張國榮拍攝電影《金枝玉葉》時紅透半邊天，登上事業巔峯，肥佬黎問她可有想過再登巔峯？她說：「我都唔知呀，我都想！」蔡瀾認為靚靚遇到合適劇本，一定可以再闖高峯，但先要注意身形，他笑說：「唔好一結婚就唔理身材囉！」靚靚坦言自己都想過減肥，只可惜為人母之後，忙到不得了，已沒有空閒時間做運動。幸好兒子魔童已7歲，靚靚去年開始逐漸活躍幕前，並打算用一半時間工作，一半時間照顧家人。
肥佬黎認為好劇本可遇不可求，便問靚靚可有考慮整容，予人煥然一新感覺。靚靚聞言反應甚大：「唔好嘞啩！我接受到攞嘢出嚟，接受唔到放嘢入去！你話攞眼袋，OK，但放個下巴、放個鼻呀、放個胸呀，我唔得！」蔡瀾也反對靚靚整容：「打吓打吓就變成怪物！」靚靚本月將會投入工作，原本打算再瘦一點，但因為要顧及老公感受，所以只能最多減10磅。肥佬黎笑說：「（老公）陣間一攬落去，淨係骨咁唔掂喎！」靚靚自嘲最瘦的時候，前和後都幾乎一樣平坦。
自嘲色誘失敗
肥佬黎問靚靚如今最想演出哪些角色？靚靚說：「其實我好想演一套寫實啲嘅苦情戲，因為我成日俾人一個感覺太喜劇，但我覺得自己好感性。」肥佬黎覺得她最適合演一些受盡委屈的角色，因為可以將她的潛質爆發出來。此話一出如同擊中靚靚的神經，她連聲附和說：「係呀！係呀！」肥佬黎七情上面的演繹：「如果有樣嘢使到你抑鬱，抑鬱到想殺人！咁樣就可能會有突破。」
肥佬黎繼續給予意見：「或者做場精采床戲！」靚靚說：「搵鬼睇咩？」隨即講述當年拍過一齣爾冬陞監製的電影《我愛你》，講述她被方中信拋棄，放縱了自己，其中一幕她僅穿胸圍色誘吳鎮宇，卻引來全場觀眾取笑。靚靚說：「觀眾唔會覺得佢放棄咗自己，只會話唔係啩阿靚，唔好搞呢啲嘢啦！」這件事對她來說是很大打擊，她說：「失敗，原來我做唔到呢啲。」Tanya坦言：「如果我係觀眾，我可能都會打咗個突，哈哈！」
服裝:ANTEPRIMA
靚靚貪玩玩唔停 係咪過度活躍症？
http://bit.ly/talk243401
港女搵老公 個樣一定要普通
http://bit.ly/talk243402
靚靚踢爆ChiLam「做乜都係三分鐘熱度」
http://bit.ly/talk243403
減肥新秘訣 老公鍾意點就點
http://bit.ly/talk243404
喺娛樂圈點Sell自己？王晶有好橋畀你！
http://bit.ly/talk243405
一代巨星好鬼寸 唔係人人頂得住
http://bit.ly/talk243406
靚靚讚CHILAM好脾氣 唔怕靚仔冇本心
http://bit.ly/talk243407
男人成日想去滾 女人詐傻好頭痕
http://bit.ly/talk243408
觀眾笑自己床戲 靚靚呻好大打擊
http://bit.ly/talk243409
拍喜劇冇突破 喊苦喊忽先有MARKET
http://bit.ly/talk243410