同人唔同命！立法會主場搞春茗請狼振英，泛民，連自由黨都唔多畀面無全體出席，反而政務司司長林鄭月娥喺官邸搞政改早餐會，泛民畀面之餘，自由黨5位議員更場場都到。
林鄭就政改問題請客食飯，真係夜以繼日、日以繼夜咁進行㗎。繼今年1月喺官邸搞咗4場政改晚宴之後，兩個多月後，佢又再次搞早餐會啦！林鄭分別喺今個月18、19、21同26號搞嘅4場早餐會，唔計立法會主席曾鈺成，只係得11位議員缺席，各大黨派議員都派人去足4場。睇番個出席名單，18號第一場亮點有社民連長毛大戰左到核爆嘅民建聯譚耀宗、經民聯梁美芬同新民黨葉劉。
19號第二場削啲，大部份都係建制派；到21號春分第三場又係焦點，有建制派田氏兩兄弟同工聯會陳婉嫻，仲有民主黨劉慧卿同埋公民黨郭榮鏗；至於壓軸26號嗰場則有「政界元秋」民建聯蔣麗芸同外號「AV仁」嘅民主黨何俊仁。八方大膽預測，呢啲早餐會傾完都只係得個桔，因為阿爺落咗柯打搞假普選，所謂有商有量只不過係口號式嘅嘢嚟啫。