噚日係驚蟄，唔少人都會去打小人，祈求來年順順利利。講開小人，又點會少得一班經常禍及香港市民嘅政府官員。女長毛雷玉蓮噚晚就帶埋以狼振英為首嘅17個特區官員大頭相，去咗鵝頸橋幫市民打小人出氣。唔少路過嘅市民睇到好興奮，證明呢班官員喺香港人心目中都幾乞人憎。
要打呢班高官喇喎，女長毛一啲都唔求其，帶齊小人紙、肥豬肉同膠拖鞋，跟足傳統好好招呼佢哋。佢話喎，咁多個官之中，最抵打梗係狼振英，咁鍾意講大話，似足小人。女長毛仲特登用肥豬肉撻落去啲官嘅大頭相度，寓意塞住佢哋把小人口喎。唔少行過嘅市民見到都大聲叫好，影相留念，仲叫女長毛打多幾吓咁話。仲有一位讀緊嶺南大學嘅學生捐錢畀女長毛，指明要打陳茂波，話佢上任咁耐，多次俾傳媒揭發有利益衝突，操守好有問題。