新地（016）旗下一田百貨舊年高速擴張，CEO莊偉忠話今年會開慢啲，全年只開多一間超市，新店座落東九龍，預計9月或10月開張，面積約3.2萬呎，投資約5,000至6,000萬元。
對於新店位置，莊偉忠大賣關子，但由於一田至今只會喺新地旗下商場開舖，喺東九龍又要有咁大個舖面嘅商場，似乎只得觀塘apm。
apm𠵱家有由永旺（984）經營嘅AEON超市（前稱吉之島）。一田2010年喺大埔開舖，同埋舊年進軍荃灣，咁啱都係趕走AEON，用咗佢哋個位，今次唔通又係咁？
對上述推斷，莊偉忠冇正面回應，只承認新店係喺舊場，所以會取代原有商戶。莊偉忠強調，生意係各有各做，佢從來唔考慮係咪趕走對手呢種問題：「我只諗自己做唔做得掂個場，絕對唔係要趕走邊個，市場有多啲競爭咪仲好。」