講今日stock pick前，先update一下近期推介︰水務股桑德（967）終於破頂，現價市盈率僅22倍，同光大國際（257）及北控水務（371）平均市盈率44倍比較，等同半價大平賣，未到價！世紀陽光（509）盈利一如預期強勁，管理層明言不排除搞分拆，試衝上月初高位1.13元目標不變。常茂生物（954）大升後稍作回調，低位明顯有買盤吸納，有跟進嘅戰友，繼續坐定定等放榜。
友報專欄作家噚日提到，科網股越升越有，往後好難搵到有同樣效果嘅主題，要趁禾雀亂飛時搵夠過冬，唐牛對此不能同意更多。
不是嗎？睇下雙馬概念股中信21世紀（241）同埋華南城（1668），入股後未有聽聞注資或合作，連樓梯都未響過，竟然可以分別炒到250億及300億銀市值，是但扑中一隻，肥過肥仔水，噚日仲進佔成交榜第四及第五位，甚麼中移動（941）、匯控（005）全部讓位。
離譜嗎？這就是新經濟概念下嘅新常態。今日唔講市盈率、息率、圖表走勢，純以瘋狂mode諗，同小米合作嘅通達（698）肯定有排炒。小米盒子大行其道，煲劇迷人人有一個，遲吓世界盃，呢個米盒肯定大派用場，通達如果沾到上邊，而家60億銀唔夠嘅市值，會係將來嘅零頭價。
唐牛