麥浚龍（Juno）首次執導的電影《殭屍》叫好又叫座，王晶、彭浩翔及劉觀偉等等都食住殭屍熱潮拍戲，據悉外國娛樂公司21世紀霍士及華納兄弟等亦睇中《殭屍》劇本，打算翻拍成亞洲版《Walking Dead》，更力邀Juno親自操刀做導演。
籌拍犯罪電影
隨着美劇《24》、《Homeland》及《Walking Dead》等在東南亞越來越受歡迎，加上本地電視劇亦只是千篇一律的膠劇，明顯有質素的劇集大有市場，所以不少外國娛樂公司如美國的21世紀霍士及華納兄弟等，近年都有意開拓亞洲電視圈。本報獲悉兩大娛樂公司睇中Juno掀起的中國殭屍熱，有意以《殭屍》為藍本打造成亞洲版《Walking Dead》。雖然Juno首次執導的《殭屍》獲得不少好評，而片商亦紛紛要求《殭屍》開拍續集，不過Juno早已明言叫停，因此才會有開拍成電視劇的提議。
據悉外國發行商更力邀Juno擔任電視劇的導演，為電視劇拍攝第一集，至於演出人選方面，未決定會否加入亞洲演員，但據知Juno已經婉拒參演，皆因現時他有多個劇本在手，根本無暇分身。本報記者昨日致電Juno，他說：「我確實有收過有關消息，不過係邊間外國娛樂公司就未可以公佈，而細節亦未傾。我今年兩個project暫時都同殭屍無關，𠵱家仍然籌備緊一個犯罪電影嘅劇本，嚟緊《殭屍》會喺美國、韓國同日本等地方上映，宣傳期都好緊湊，所以一切要等坐低傾咗先。」
早前蕭定一邀請他為《3D紫荊俠》執導，不過Juno透露因為檔期問題，應該不能合作，另外，《殭屍》亦入選稍後舉行的比利時電影節。
採訪：盧妹