所有參與二月十七日馨香宴嘅客人離開時，都獲贈一個麗確環保袋，袋內有半島酒店曲奇、樂家杏仁糖、台灣腐乳及一罐「私房曲奇」。半島名氣大，差不多人人都食咗半島嘅曲奇先，名牌就有呢樣先入為主優勢。至於腐乳呢，似乎不起眼兼老套，但每年由勤力德贊助，好吃腐乳者，發覺勤力德從台灣辦貨回來嘅腐乳，直情係珍品中之珍品。大編輯有一位死黨，每年農曆年過後就向佢打聽馨香宴舉辦之時間，每逢馨香宴次日就會打電話俾大編輯：「今年樽腐乳收到未，我就快嚟攞！」大編輯為成人之美，每年都將台灣腐乳轉送俾呢位死黨，自己反為無食過。
左丁山在新年收到之曲奇餅，款式甚多，由年初一至今，還未吃完，前星期將馨香宴贈送之「私房曲奇」轉送俾一位年青教師C，年輕人教書，有新念頭，佢將盒曲奇拎返學校，上堂時向學生問IT問題，答中有獎，於是學生頻頻舉手回答，於是佢打開盒「曲奇」派餅，先至發覺盒內並非曲奇，而是蝴蝶酥，冇所謂啦，一堂之內，成盒派完，佢留番一件俾自己食，發覺好好味道噃，學生亦高呼「好食、好食」。次日，幾位學生追住教師C問同樣問題：「我地留住塊蝴蝶酥返屋企向媽咪示威，話自己上堂答啱問題得獎，媽咪好開心，同我地分吃，塊蝴蝶酥，媽咪一吃就猛話好味道，要我地返嚟問你，究竟係乜嘢牌子，喺邊度買得到？媽咪要買呀。」
教師C一時答唔到，WhatsApp問左丁山，左丁山又問公關大姐大，大姐大打電話嚟鬧鬼：「你咁大頭蝦㗎，啲蝴蝶酥係Joseph Wong自己送嚟㗎，佢係崇基師弟，現在開咗間Cookie Galerie（曲奇薈），上環有一間分店，喺蘇杭街。」哦哦哦，蘇杭街就在中遠大廈（Cosco Tower）附近，好易去啫，教師C託左丁山去買多幾盒美味蝴蝶酥，舉手之勞耳。
今時今日，賣曲奇成行成市，若非有料，幾難企得住腳。例如上星期日，勤力德送我一小盒曲奇，係佢太太在屋企自製，聲明全部用有機材料，夠晒健康，唔駛在市場買入曲奇咁話。自製麵包曲奇，已成中產潮流，不少朋友自Panasonic麵包機出現後，群起購入，自己買有機食材，製造菠蘿包等等，（雖然成本仲貴）但食得開心、安心喎。