「過往表現不代表將來表現」，用喺炒翻身股最啱，上文推介的中軟國際（354），炒過的都覺得惡炒得很，業績冇乜錯，只是股價長期唔突破，上上落落好沮喪，昨日趁住隻中信21世紀（241）炒到上外太空，狂飆一成成功破位，Samantha認為，除了有啲永遠唔掂得嘅股（你懂的），積弱板塊有時應該畀個機會佢，講的是雷士照明（2222）。
LED整個行業近排看來撻番着，美國今年起全面禁售白熾燈，中國在10月起將禁止入口和銷售60W白熾燈，在全球淘汰白熾燈的政策帶動下，LED的市場滲透率將進一步提升，加上阿爺新一輪的補貼政策由上游，轉而直接向消費者補貼，令行業發展更健康，阿爺近年積極推動智慧城市，亦都為新能源LED照明製造需求。
雷士最新公佈的中期業績，雖然多賺92.3%達8,123萬元人仔，主要受惠於管理費大減38%，營業額和毛利率不見重大突破，不過摩通上月發表報告指，雷士LED銷售佔比將會由去年上半年的增長16%，提升至30%，相信隨LED產品普及，加埋雷士的強勁銷售網能最先受惠。集團創辦人吳長江前年成功回巢，但股東鬥爭後元氣大傷，該股過去年半都在1.6至2.7元上落，昨日急升一成，成交更創一年新高，是時候開綠燈了。
Samantha
本欄逢周一、三、五刊出