新股掛牌時要送一份具代表性嘅紀念品畀港交所（388）可能令人費煞思量。保利文化（3636）噚日就送出一個圓明園牛首銅像嘅仿製品，除喻意股份牛氣沖天、代表公司從事拍賣業務之外，又可提醒大家，母公司保利集團曾協助將流失嘅國寶帶回國。
保利文化母公司係有軍方背景嘅中國保利集團，2000年4至5月，保利先後大手喺拍賣會上，投得牛首、猴首同虎首，成交價分別係774萬、818萬同1,544萬元。三件獸首𠵱家連同其他商人投得嘅馬首同豬首，一齊收藏喺北京保利藝術博物館。
港交所發言人話，根據慣例，上市公司贈送嘅紀念品，部份會放喺交易所展覽廳或者會議廳，話唔定大家都有機會親睹呢件仿製國寶㗎。