有Bitcoin交易平台破產，令人更關注虛擬貨幣嘅安全性，不過孖寶兄弟溫克爾沃斯孖生兄弟（Winklevoss Twins）繼續以此作招徠，新近佢哋用Bitcoin買飛，參加英國富商布蘭信（Richard Branson）搞嘅維珍銀河太空旅程。
佢哋兩位一向愛出位，成名作就係狀告facebook創辦人朱克伯格偷橋；Bitcoin未開始熱炒之前，孖寶已經開始投資，仲成日賣廣告話Bitcoin係好嘢。
佢哋參加太空旅程，都要講到好偉大咁，話Bitcoin同布蘭信嘅維珍銀河，代表佢哋個投資基金Winklevoss Capital嘅目標，支持創建新世界。
又話今次旅程係利用可能改變交易模式嘅新科技，媲美馬可孛羅、哥倫布等探險家嘅努力嘗試。根據維珍銀河資料，一張飛賣25萬美金（約195萬港元），預計明年升空。