香港嘅保皇黨呢，就黑暗醜惡嘅……中西區區議會轄下嘅公民教育工作小組，噚日喺冇事先張揚下鬼祟開會，準備審議25萬元政改宣傳撥款申請。由於中西區會議常規只規範大會旁聽安排，冇講小組唔准市民旁聽同傳媒採訪，有記者噚日到場想聽會，贒實一班區佬用乜嘢理由通過撥款。點知小組主席李志恒竟然落閘報警，勒令記者離場，話會議要閉門進行喎。
搞徵文比賽索價11萬
嘩！大剌剌25萬公帑，你估區議會係你班區佬獨立王國呀？點解可以惡到使納稅人血汗錢仲要黑箱作業禁止真相曝光呀？記者唔肯就範，問李志恒憑乜嘢理據、有冇議事規則support你作出呢個黑箱決定？李志恒講極都講唔出，大概建制派地區人士都係咁嘅質地啦。李志恒話記者冇事先申請，再喺建制派議員護航下，通過動議反對記者在場，再出動保安趕走記者。
八方事後喺消息人士手上攞到份申請撥款文件，終於明白點解建制派咁驚審議過程曝光啦。皆因唔少親中團體申請撥款搞嘅政改宣傳活動，都極盡騎呢，例如「香港島各界聯合會中西區地區委員會」就申請4萬幾元，搞5場「午間茶聚會」兼派紀念品，搞個徵文比賽加巡迴展仲要超過11萬元。另一個「香港基本法推介聯席會議」更騎呢，話要搞個「基本法推動留影區」，即係整個佈景板畀人影相留念，索價6,700元，另外搞個兩日一夜宿營，主要活動係「破冰及團體遊戲，透過不同遊戲進一步認識自己，學習與別人相處合作」。
呢啲極醜惡政治分贓，難怪建制派議員要黑箱作業，不惜動員保安同報警都要趕走傳媒同民主派區議員！
mailto:[email protected]