政府雖然正式獲通過辣招，但辣招苦主大聯盟就打算繼續出招，搵來美聯物業（1200）旗下美聯大學堂幫手出書，準備喺今年書展面世。書中除咗有學者、專家狂轟辣招禍害，又訪問受辣招影響嘅行業，包括按揭公司、承造樓契嘅律師行、搬屋公司等等。
辣招其實唔只搞到地產代理冇啖好食，其他行業亦遭殃，好似舊年10月，一班搬屋公司搞慢駛遊行，大呻辣招導致生意大減，殊不知博唔到市民同情或政府撤辣，反而自挖墳墓。因為廣告公司見佢生意慘淡，出車量少，即刻抽起貼喺車上面嘅廣告，令廣告費補貼都冇埋，雪上加霜！
又有按揭中介公司因辣招導致生意額大跌五成，原本傾得好地地嘅客人，尤其係換樓客，正因為辣招要求業主喺六個月內將原有物業沽出，先可以豁免稅款，最終因為放唔出原本個單位，搞到換樓不成。