近日回南天，水氣四溢令人不爽，人亦容易煩燥，此乃操盤大忌，加上近排黑海局勢動盪，最終唔知點收科，所以呢個禮拜採取鐵飯碗策略，少做少錯算了。
金融海嘯後，成個社會怨氣多咗，排外仇富情緒高咗，從早前嘅驅蝗風波，到報社高層遇襲等，令人不勝唏噓！姑勿論誰是誰非，都反映社會冇以前咁包容，難道真係好似李嘉誠話齋，真的寵壞了？抑或大家看不到前路，以致消極面對？
有財富管理公司近日發表調查，發現香港新一代對「錢途」最乏信心，受訪嘅80後，有近七成人擔心買唔到樓，要有瓦遮頭亦咁難，亦難怪佢哋對社會嘅不滿溢於言表。不過，正所謂船到橋頭自然直，筆者記得讀書時，香港樓價亦不斷向上，有老師更替我哋擔心，驚我哋難以置業，多年過去，回頭看覺得當年煩惱自尋。
事實上，月有陰晴圓缺，經濟亦會周而復始地運行，好多嘢去到一個極端總會掉頭，相信樓市亦如是，與其將責任推諉於人消極面對，倒不如自我增值尋求出路。不幸地，家陣民粹主義抬頭，越來越多人希望政府干預，甚麼全民退休保障、標準工時等，清一色只會削弱香港嘅競爭力，「老馮」傾向日益明顯，令香港逐漸變色。
加澳央行按兵不動
牢騷講完，本周係超級議息周，全球有四間主要央行開會，早兩日開波先嘅澳洲同加拿大，一如所料按兵不動。
雖然澳洲儲備銀行今次會後聲明又玩出口術嫌澳元貴，但噚日揭盅嗰兩個數據有驚喜，其中1月零售銷售上升1.2%，拋離市場預期嘅0.5%，貿易盈餘亦遠超預期，刺激澳元爬上90美仙；加元就繼續牛皮，在1.10兌1美元爭持。
以表現計，澳元和紐元呢對商品活寶噚日最得寵，新西蘭儲備銀行下周四議息，市場普遍預期加息四分之一厘，成為首間加息嘅G8國家央行。加息憧憬刺激紐紙噚日升至84.79美仙，創今年高位。雖然紐元兌澳元交叉盤未能同步攀升，但噚日高位報0.9373，與1月16號嘅8年高位嘅0.9471相差100點子。
事實上，睇番圖表，紐元兌澳元已升咗近3年，由本欄去年8月初推介時嘅0.88起計，至今再升逾6%。喺加息預期下，紐元短期看高一線，紐元兌美元有望上試85美仙，能否更進一步，就要視乎下周四嘅議息聲明，如果央行暗示仲有得加，紐元應有力再上，相反，若央行未有加息，或加息後會後聲明暗示短期唔加，紐元隨時借勢回吐。
珍惜紐元最後派對
正加上月初本欄所講，澳洲息口似乎已見底，已削弱紐元相對澳元嘅優勢，若新西蘭央行暗示息口仲有得加，短期仍有得博，但估計呢個升市最後派對已進入encore時段。
奇兵
本欄逢周五刊登