AV仁早前喺立法會睇寫真相，搞到形象插水，狂俾政敵抽水是常識吧！噚日就輪到正義聯盟李偲嫣帶隊抽水啦。佢哋去到立法會樓下，除咗高舉示威標語要AV仁下台，寸佢又懶又假之外，偲嫣BB仲落足本㗎，同埋佢班「正義」戰友，帶咗好多本𡃁模寫真話要向AV仁送大禮。
有眼利網民就發現，偲嫣BB隔籬位嘅阿叔，手持一本E Cup Baby劉欣宜嘅寫真，上面仲有人哋E Cup Baby嘅親筆簽名㗎。正義聯盟嘅朋友咁辛苦先至撲到本親筆簽名𡃁模寫真，都肯咁慷慨割愛畀AV仁，可見正義聯盟同AV仁之間，其實都唔係所有嘢都係咁對立嘅。起碼喺鑑賞美女圖片呢個範疇上，佢哋應該可以做到朋友。