魔童王維基噚日喺《經濟日報》出咗篇專欄文章，以早排去銅鑼灣茶記食咗客165蚊雞鵝髀飯做例子，加上滿舖盡是內地客，質疑自由行推高香港嘅租金、物價。唔少網民紛紛讚好，不過八方好奇究竟邊間茶記賣成165蚊個雙髀飯呢？
問番魔童，佢話唔記舖名，但就有形容吓間茶記嘅位置。八方估計係多多餐廳，噚日專程去睇睇，發現雙髀飯售120蚊，雖然唔平，但都冇魔童講咁貴。再講雙髀飯向來都係貴價飯，魔童以髀立論似乎有啲牽強喇。睇埋餐牌上其他食物，切雞燒鴨飯45蚊、四寶飯55蚊，旺區嚟講係咁上下。經理話，每月租金成40萬，人工又貴，建議大家落單前問真價錢先。