騰訊（700）噚日又破頂，一度高見631元，好多未有貨嘅股民都會問，咁嘅價位仲追唔追好？大家不妨參考下九倉（004）主席吳光正點炒騰訊。
翻查吳光正間御用經紀行哥連頓證券持倉紀錄，發現佢炒騰訊track record原來唔差。舊年8月開始掃貨，平均每股358元，坐貨唔夠一個月，騰訊破400元大關，佢9月就用八日沽走61.4萬股。點知騰訊越升越有，吳光正忍手忍到10月底，打倒昨日沽貨嘅自己，急急再追貨，今次用咗兩個月，大手掃92萬股，然後在1月23日一鋪過沽貨，賬面賺1億元，回報率26%。
騰訊上周破600元大關後，佢就照買咗2.6萬股。由1月28日計入市十次，掃咗30.5萬股，平均每股成本561.7元，騰訊噚日收報622.5元，吳光正暫時賬面賺1,900萬元或11%。
雖然炒騰訊成績唔錯，但吳光正都唔係每隻股票賺錢。好似今年初佢就減持一半，即150萬股長實（001），平均價約114元，以長實噚日收市價124.6元計，賬面就唔見咗1,500萬元。