【中環】六叔邵逸夫年初過身，佢喺電影同電視嘅貢獻，連日前美國奧斯卡頒獎禮都對佢作出悼念，可見六叔嘅地位有幾舉足輕重。六嬸方逸華都收拾好心情，不時見佢約朋友出嚟行街嘆茶，生活依舊咁過，好似前晚六嬸就約咗無綫製作資源部總監樂易玲，以及曾經做電視、𠵱家係英皇高層嘅吳雨，三人行喺中環食飯敍舊。
不停講電話
唔知係咪黃宗澤同楊崢單姊弟戀搞到一鑊泡，公司同藝人又不停有負面新聞，前晚見樂易玲單拖喺置地出現時，坐喺水池邊打電話係咁講，愁眉苦面好似訴苦咁，唔知係咪為呢啲新聞頭痕？
冇幾耐見吳雨到達，佢一見樂易玲先搭吓佢膊頭然後坐喺佢隔籬，樂易玲就繼續講電話。
六嬸拎Chanel
再過一陣攞住Chanel手袋嘅六嬸現身，樂易玲同吳雨第一時間起身迎接。雖然六嬸已經79歲，但相當精神，企喺度同樂易玲、吳雨吹水吹咗足足成分幾鐘，其間佢仲不停指手劃腳，精靈十足。
之後佢哋三個去咗置地嘅Zuma日本餐廳食飯，樂易玲唔知係咪想向六嬸同吳雨為公司近日問題求助訴苦呢？
採訪、攝影：潘冠恩