美國駐港總領事夏千福憑親民形象，俘虜港人，但相信喺港人心目中，千福BB就未必係闊佬僱主嘞！夏千福近日出廣告請司機，八方本來以為美國堂堂大國，出手應該唔低，點知千福BB司機嘅月薪，計埋晒各類津貼竟然先得10,628蚊，就算連埋雙糧，除番開都只得11,459蚊一個月，同洗碗員同價，落後大市！
包埋津貼唔夠12,000蚊
千福BB近日喺勞工處刊登廣告請司機，但係齋講月薪已經輸晒，只係得9,980蚊，連埋雙糧同每一個月648蚊嘅住屋津貼，計埋唔夠12,000蚊一個月。雖然人工低，但係千福BB要求都好高㗎。申請者要有中三程度，兩年經驗，中英文要識講聽兼識寫，仲要有公共、私家小型巴士、輕型貨車、私家車駕駛執照。出手咁低，好難吸引到人才㗎喎，除非閣下真係千福BB嘅超級粉絲，否則真係唔知點解要應徵呢份工。唔知美領館有冇考慮過，如果做司機嘅員工福利包埋張綠卡，可以移民美國，咁相信就會有好多人會仆到去申請嘞！
八方睇過吓勞工處網頁，私人司機嘅職位月薪可以高達22,000蚊，平均都有14,000至19,000蚊，大把選擇，做千福BB嘅司機只就好在五天工作。至於特首嘅司機收入都好高㗎，起薪有22,165蚊，頂薪到23,285蚊，仲可以同公務員一樣，年年加薪。不過，服侍狼英喎，你係咪肯先！
mailto:[email protected]