睇開《蘋果》嘅讀者，應該都好熟資深驗樓師詹濟南。詹sir驗樓就好似食咗誠實豆沙包咁，邊個發展商都無情講。問佢舊年收樓質素最差係邊三個新盤？不如猜下謎先，謎面分別係「短樁樓」、「擺咗好多年，聞到鹹水味」、「天台無圍欄」，排名不分先後，睇完呢篇文就知答案。
靠驗樓爆紅嘅詹sir成立咗個香港專業驗樓學會，噚日舉辦第二屆「2013年度建造及裝修業優秀大獎頒獎禮」，一眾發展商高層、判頭齊齊到場。
詹sir總結過去一年驗過24個新盤，超過2,000個單位，以專業眼光評定最好五個新盤，包括新地（016）嘅筲箕灣譽都及譽．東、新地及信德（242）合作的紅磡昇御門、信置等（083）嘅油麻地御金．國峯及大角嘴奧柏．御峯。
講到最難忘，佢話：「去到九龍塘一個屋苑，單位入面有條內置樓梯，行上天台，發現無欄杆，幾震撼！唔知天台可以用來做乜，除非擺啲魚上去曬太陽。」一聽就知佢講緊長實九龍塘珏堡。
佢感慨近年收樓質素：「好嘅更好，衰嘅更衰」，記者追問邊幾個更衰，佢話唔方便講，不過換個方式講，「最令我失望嘅樓盤，一個係短樁樓。跟住嗰個好多貨尾嘅……擺咗成八、九年仲有貨尾，聞到鹹水味嘅。」記者追問是否天水圍居屋天頌苑及恒隆大角嘴浪澄灣，詹sir回答：「你自己估㗎咋！」
疑似驗樓最劣質三個樓盤
【1.九龍塘珏堡】
發展商：長實
詹sir評語：單位有條內置樓梯行上天台，天台無欄杆，上到去唔知可以做乜，好震撼，可能可以擺啲鹹魚曬太陽
【2.大角嘴浪澄灣】
發展商：恒隆
詹sir評語：單位老化問題嚴重，地板多空隙，換了幾手板有幾隻色，好唔自然。廚房鋅盆漏水，廚櫃發漲，冷氣掣和燈掣發黃
【3.天水圍天頌苑】
發展商：房委會
詹sir評語：全屋有30多個瑕疵，客廳地台石屎隨手拎得起。主人房地台勁斜，斜逾30毫米。廚房有一半是空心磚
資料來源：綜合過往驗樓紀錄
李華華
mailto:[email protected]