新世界發展旗下嘅上海K11本周有盛事,由集團聯席總經理、彤叔長孫鄭志剛(Adrian)親自飛去法國斟番嚟嘅40張印象派大師莫奈(Claude Monet)作品、12張印象派作品及3件莫奈用品,將會喺星期六開始展出。聽講淨係保險支出都有6億歐元,差唔多成64億港紙。
新世界嘅股東唔使嚇親,呢筆投保費唔使新世界拎出來,而係由莫奈博物館負責。
今次莫奈展收費100元人仔,聽講都係全數入博物館袋,K11就唔會抽水。相信Adrian都計過數,搞番個媲美國際級博物館嘅展覽,省靚K11招牌,提升商場級數,第日總可以喺租金賺返呢筆「宣傳費」。
至於64億元保費貴唔貴?55件展品除開大約1.2億元。仲記得04年法國國寶畢加索《巡遊》喺中環IFC展出,新地同恒地就唔肯講保費幾多,不過同年《巡遊》喺深圳展覽,主辦商就透露過保費達1億人民幣。如果咁計,K11莫奈展保費亦唔算特別過份喎。