為咗撐公司，你可以去到幾盡？通用電氣（GE）主席兼行政總裁伊梅爾特，就耗盡舊年份花紅，嚟話畀大家知佢對公司幾咁有信心。伊梅爾特話，佢同投資者一齊投資，實行坐埋同一條船。佢將舊年260萬美金（約2,028萬港元）嘅現金花紅，全數用嚟掃公司股份。根據美國證監會（SEC）資料，佢早前以每股25.19美金，買入10.49萬股。如果計埋佢今年1月用100萬美元掃入嗰4萬股，今年已入咗360萬美金，成28球港銀。
佢話同公司其他高層一樣，對公司好有信心，所以身體力行將成份花紅掟晒落去。無他嘅，通用電氣股價近期表現麻麻，今年已經跌咗8%，作為公司話事人，點都要帶頭做番啲嘢，為公司打打氣。