2013/14年度財政預算案內容，由於在宣讀前，政府早已不斷放風向傳媒洩露，並無驚喜，細看則平平無奇，無非係按照梁振英之大力興建房屋嘅施政大方針，盡量搵土地配合而已，甚麼優惠、派糖之事，則屬應酬性質，敷衍了事，究竟特區政府對香港經濟發展、社會發展、醫療、教育如何不斷進化，為香港造大個餅，即是願景之類，睇得到算你好嘢。
唯一凸出嘅財政司司長信息，就係在第129至139段，引用「長遠財政計劃工作小組」之建議，再三強調要嚴格控制開支增長；以中期預測的GDP名義增長率（即未扣除通脹之增長率），作為預算開支總額增幅的上限，令公共開支在GDP嘅份額，不超過20%。小組推算到未來二三十年，政府收入趨勢增長為4.5%，推算到期末，政府收入會佔名義GDP嘅19.8%。
如此說來，政府開支未來會跟着GDP增長率變動，經濟環境差到似2002、2003年時，政府開支可能會負增長㖭，換句話說，曾司長與陳德霖，口邊常掛着嘅所謂反周期措施，睇來係多餘嘅，曾司長訂下上述之20%規律，已自願廢掉任何財政政策。香港因有神聖不可侵犯之聯繫匯率，早已放棄了貨幣政策，要跟着美國聯儲局嘅指揮棒走，而今連財政政策都唔要咯。
平情而論，公共開支佔GDP 20%之建議，並非上述小組所創，上世紀七十年代嘅財政司夏鼎基先生係開山祖師，但當時夏鼎基堅持「積極不干預」，港元匯率自由浮動，港府有加息減息自主權，除配合麥理浩之十年建屋大計外，並不輕言「政府適度有為」或壓抑房屋需求。今天梁政府成日話要有為，必要時要干預市場運作，憑乜嘢呀？只憑行政命令（如樓市辣招）而已，人為地改變市場行為，更有甚者，目前香港不比70年代，人口迅速老化，醫院不夠，醫生護士嚴重不足，勞動力不足，遊客激增，在各個經濟層面必須增加供應。偏偏上述之事，政府又唔肯放手讓私人建設、投資，究竟想點呀？呢個政府實在令人摸不着頭腦。