西班牙國家隊由08年贏歐國盃冠軍起一直喺國際球壇稱王、巴塞隆拿喺過去近10年球會級賽事亦一再登上頂峯。喺呢兩個咁成功嘅王朝度，佩奧爾都係當中嘅中流砥柱。不過再鋒利嘅刀都有生鏽嘅一日，35歲嘅佩奧爾終於決定退下來，一代忠臣喺周二宣佈會喺今季結束後離開巴塞，「唞一唞」再另覓新發展。
為巴塞擸21項錦標
喺95年加入巴塞拉瑪西亞青訓，96/97球季首次喺巴塞C隊上陣；到99年10月得到當時教練雲高爾提拔下，首次代表1隊披甲，一轉眼就已經征戰咗頂級賽事接近15年。佩奧爾喺巴塞經歷過高低起跌，絕對係球隊贏盡大小錦標嘅重要功臣；佢亦見證西班牙國家隊王朝崛起，連贏08年歐國盃同10年世盃，遺憾嘅係佢因傷缺席12年歐國盃，國家隊蟬聯冇佢份。
佩奧爾喺近兩年養傷多過踢波，佢都知自己身體狀況難以應付到頂級賽事，喺星期二突然開記招。佢話：「到今個球季結束嘅時候，我就唔會再係巴塞球員，提前結束同球會尚餘兩年嘅合約。經過兩次大手術之後，我發現自己唔再喺最高水平，令我做出離隊嘅決定。不過我有3點聲明，一，我唔係今日就走，剩返呢3個月我仍然會全力以赴協助巴塞爭標；二係當球季結束之後，現階段我仲未確定下一步會做乜，因為受傷我已經連續4年冇唞過，要休息返夠本先；三係到季尾我會再召開一次記招，正式向呢19年我身邊嘅所有人告別，到時再回答大家所有問題。」
傳下一站登陸美職
佩奧爾幫巴塞至今贏過21項錦標，佢亦啱啱喺上場西甲超越前輩米基利（Migueli），以392場成為球會累積西甲上陣次數第2多嘅球員，無疑係球會史上最偉大嘅隊長之一，我求大俠都要向佢致敬。
當今球壇以金錢掛帥，「一生一球會」嘅球員已經買少見少。有傳佩奧爾下季會去水平較低嘅美職聯延續足球生涯，另外亦有傳AC米蘭貪免費想翻兜簽佢加盟，無論邊樣係真，相信都無損佢嘅忠臣形象。
