恒地李家傑日前喺人大委員長張德江接見港區政協時，獲安排首先發言，打頭炮嘅佢語出驚人，忽然棒打民調，仲要點名鬧港大民意研究計劃，兼要求八大商會夾錢搞民調，聽到唔少在席委員滴晒汗。
有人以為李家傑忽然發口痕，但八方聽聞，查實有冇得喺會上發言，獲點燈嘅政協委員北上開兩會前已心中有數，所以早有準備，有委員甚至一早打好發言稿，可見李家傑嘅意見係諗過度過，相信中央有關方面都知佢講啲乜。
查實言論驚天動地之時，李家傑嘅普通話水平，亦都技驚四座。唔少政協委員都大讚，原來佢咬字咁鬼正，煲起冬瓜講得好好聽，呢個算係此行一個另類小發現。
話說回來，原來張德江有喺會上畀like，讚今年發言嘅政協委員普通話水平進步咗。查實噚日發言嘅委員仲包括梁高美懿、蔡冠深、劉遵義、彭長緯、王䓪鳴同陳新滋等。