邊一隻錶，係李家誠、馬清偉都戴？依家中環金融才俊最趨之若鶩嘅？答案，係嚟自瑞士嘅Richard Mille。
噚日，喺K11嘅Hyatt有一場香港鐘錶聯展，幾乎雲集齊全香港嘅水貨錶鋪老闆同水貨錶。呢個只有識途老馬至知道嘅展覽，搞手係錶界潮人Sam孔慶森。
本身係智欣鐘錶珠寶董事經理嘅Sam，手戴著嘅Richard Mille RM011 Felipe Massa Limited Edition，全球得10隻，成隻錶嘅物料係Titanium鈦金加塑膠，「0黃金0鑽石」，佢喺一年前用40萬買入，今日已經升到50萬，而個品牌、design同機芯就係身價所在。
阿Sam話，Richard Mille喺4、5年前左右登陸香港，呢幾年紅得好犀利，一二手都缺貨，啲錶嘅入場費由40幾萬起跳，最貴去到500幾萬。而除咗手戴著嗰隻，佢仲推介RMO11紅金特別版，市價60萬。
不過，正常嚟講玩錶唔會一起步就幾十萬，撇開Richard Mille，阿Sam建議，入門初階可以揀10萬蚊樓下嘅PP（柏德菲勒）同勞力士，又或者7、8萬左右嘅Panerai入門版；進一級去到中檔，AP（愛彼錶）嘅ROO（Royal Oak Offshore）呢一期深得人心，市價26萬左右；去到高級組，就視乎自己喜好，因為絕大部份嘅品牌，都會由入門版出到貴價版，最貴嘅通常都係幾百萬一隻。阿SAM又話，買貴價錶其實係保值嘅，當有一日霎時間要套現，唔一定係勞力士先可以救命，最緊要係搵到一間識嘢嘅當鋪，以佢嗰隻RM11為例，依家去「舉」至少都值40萬。
講番呢個展覽，阿SAM話一年會搞大概10次，一次嘅生意額閒閒哋七八千萬，佢又話，香港係自由社會容許水貨存在，雖然咁樣對行貨會造成好大競爭，但市場確實又有需求，因為，水貨一般平過行貨10%，更重要係好多款行貨未必有，依家全港大約有百幾間水貨錶鋪。佢又話大陸打貪都有少少影嚮，不過依家唔同2003年自由行啱啱開放嗰陣，內地同胞好識貨亦好知價，仍然有好多人嚟香港搵百幾萬一隻嘅心頭好。