普京一聲令下收兵，大市即刻翻生，玩期指嘅朋友，一個唔好彩隨時捱足兩巴。資金繼續追住個股炒，十大升幅榜中，有五隻係創業板，鑊氣十足。
除正路環保及新能源股外，電動車板塊亦靜靜起革命，龍頭比亞迪（1211）三扒兩撥上番50蚊。放眼美國，熱爆電動車製造商Tesla，短短兩個月爆升七成，新近更宣佈豪擲50億美元興建超級電池廠，就連蘋果都話有興趣玩埋一份，市場潛力之大可想而知。本欄今年頭炮推介嘅耐世特（1316），同樣擁有電動車基因，噚日雖再創上市新高，但未有耐到終點，繼續坐定定！
耐世特原擁有嘅五大賣點，戰友可上網翻查拙作重溫，不贅！最新畀多兩個驚喜大家︰第一，集團早前與寶馬i3電動車協議，為後者供應EPS系統，拍得大碼頭兼食埋綠色概念，成功升呢。第二，耐世特預測去年盈利不少於8.2億銀，意味純利增幅將逾八成，盈喜乃遲早問題。
睇估值，彭博綜合券商預測，耐世特市盈率16倍，比亞迪及Tesla分別為131倍及150倍，耐世特平均計大折讓九成，雖然規模冇得比，但估值不致於咁懸殊，係咁易收窄至八成，即27倍市盈率，耐世特可見8.9元，剛好與年初定下倍升目標一致！
唐牛