周日反暴力遊行，有過萬市民上街聲援齊撐新聞自由，令八方好感動。當日有市民自發買咗2,000封郵簡，喺遊行期間向市民派發，鼓勵大家寫信畀政府或者傳媒機構，表達對新聞自由嘅關注，同埋促請政府保障新聞自由，好快就派晒。八方估唔到，噚日都會收到12封上述嘅郵簡，裏面寫咗唔同嘅鼓勵說話（圖）。捍衞新聞自由要靠市民風雨同路先成事，寄畀《蘋果》嘅郵簡中，唔少內容都提及大家會堅守新聞自由，絕不退縮；有讀者話對近日發生連串事件感憤怒同悲傷，希望劉進圖早日康復；亦有讀者希望《蘋果》繼續企硬報道真相。大家嘅一字一句，八方同所有同事都會銘記於心。