啱啱過去嘅星期一係「世界網球日」，唔同地方都有表演賽作為慶祝活動。香港有李娜、史杜莎、曉域治同貝迪治表演，迪祖高域同梅禮就去咗美國紐約獻技。
紐約表演賽戲肉係2012年美網加2013年溫網決賽嘅翻版，由迪祖高域大戰梅禮。兩大強手對陣，當然不乏精采嘅球來球往，而最終迪祖就以6:3、7:6直落兩盤贏波。
不過話晒係表演賽，最令人印象深刻嘅，應該係佢哋嘅搞鬼風趣；例如迪祖無端端喺場度做掌上壓，梅禮又同場邊觀眾high five，轉場休息嗰陣，佢地攞起手機，行到場中央玩自拍，迪祖仲乘機扮錫梅禮㖭！
經典大戰阿加斯威威
另一邊廂，梅禮嘅教練蘭度同另外3位網壇名宿卡殊、阿加斯同埋森柏斯就去咗倫敦。蘭度話梅禮經過背部手術後已經傷好，冇任何手尾，有力喺嚟緊一系列嘅泥地賽攞到好成績，對於贏個人首個法網冠軍，都好有機會。泥地一向係梅禮弱項，唔知蘭度係咪真係可以令佢脫胎換骨，打破拿度壟斷，大家拭目以待啦。
當晚備受注目嘅，仲有阿加斯對森柏斯。兩人雖然年紀大咗啲，但球技依然精湛，合演一場賞心悅目嘅友賽；最後阿加斯直落兩盤以6:3、7:6贏咗呢場牙骹戰。