想好似畢菲特咁做股神，除咗要有眼光、有錢，仲要愛得夠徹底。好似佢愛可口可樂，愛到買股份之餘，仲要日飲五罐。
眾所周知，畢菲特鍾意可口可樂，就係因為鍾意飲，所以由1988年開始，透過旗下巴郡買入可口可樂股份。當年好多人懷疑可樂市佔率會逐步縮水，但股神一於唔理，繼續投資愛股，𠵱家已經係主要股東。佢仲話可口可樂同埋富國銀行、美國運通呢啲股份，即使唔係永遠，但都要長期持有。佢前日接受CNBC訪問時仲自爆，每日飲五罐可樂㖭呀。
可口可樂上季銷售連續第四季縮水，股神依然力撐，話佢係出色品牌，佔全球飲品需求3%。最近有投資者要求可口可樂嘅競爭對手百事，將零食業務由飲品業務分拆，股神就唔多認同，話零食業務係好，但其實汽水業務都好，所以冇理由要分拆。