年前王維基為發展香港電視而大灑金錢掀挖角潮，現年82歲的資深演員劉兆銘（Ming Sir），也曾是王維基力挖對象，曾於大前年三次親身斟Ming Sir過檔，希望他為港視拍劇及擔任導師訓練新人。惟當時無綫知道王維基力邀Ming Sir過檔，即落足嘴頭力勸他留低，實行肥水不留別人田，Ming Sir有見做生不如做熟，遂決定留低繼續為無綫效力。
維基曾挖角
不過，無綫成功挽留Ming Sir後，卻一直冷待他，除去年在《萬千星輝頒獎典禮2013》頒發萬千光輝演藝人大獎予他外，就從未有委派Ming Sir任何演出，大有「過橋抽板」之感。
據悉Ming Sir為被無綫冷待而感到不開心，記者昨日致電他，他承認王維基早年曾力邀加盟：「係呀，好耐之前啦，係佢啱啱搞電視嗰陣。後尾TVB同我傾，我喺TVB咁多年，咪留番低囉。」續約後卻被無綫投閒置散不安排工作，是否為此感到不開心？Ming Sir說：「我根本未開心過，我太太走咗之後（Ming Sir太太張慧玲前年10月因癌病逝），我情懷一路仲喺我太太度，我唔開心係自己嘅唔開心。」
Ming Sir透露他跟無綫是簽一年一騷，並承認續約無綫後一直未獲工作安排，問可知箇中原因時，他說：「佢哋唔知係咪對我關心呢？關心我未走出嚟（喪妻陰霾）。」
採訪：白白