財政預算案發表後，梁粉出動批鬥財政司司長，令人眼界大開。鬍鬚仔借學者專家小組向梁振英落閘，雙方矛盾表面化，林奮強撲出來反擊，自然係代表梁振英，而鬍鬚仔則代表政務官取態。
以防派錢項目先斬後奏
落閘訊息係先此聲明，以後再有類似長者生活津貼、低收入家庭津貼呢類涉及龐大經常開支項目，要得財政司司長同意先可出台，冇得再先斬後奏。梁粉政府根本冇政治能量去推行有爭議性之勞工及社福政策，如取消強積金對沖、全民退保、標準工時，一味採取拖字訣。
政策性派錢乃走捷徑方法，可以避開商界及專業、中產，亦無需要進行嚴謹論證及諮詢，幾條友閂埋門就可以掟個低收入家庭津貼，用幾十億公帑一年，你話幾得人驚，無能之人要做事，就係用民粹方法。由於長期派錢畀基層，政客站在道德高地，大家唔敢公開反對，幾唔理性之政策，例如為非法之工廈劏房戶提供津貼，就係表表者。
梁氏政府冇規冇矩，何止體現在管治手段，如對付傳媒之上，也充份體現在內部決策程序之上。一項重大民生政策出台，對外政府必須草擬諮詢文件，廣徵相關團體及公眾意見，亦要table上立法會事務委員會討論，收到各方意見後總結然後再交代執行細節，對內除經政策局內政務官作理性討論外，也要交財務科官員審核，而AO就最怕呢一關，因為財務科會議會對政策細節及影響反覆審查，好多時會發還重擬，唔論你目標有幾崇高，幾咁為民請命，一旦執行細節解唔通，財務科照樣否決。過去多少政客對呢批AO恨得牙癢癢。英治時代留低嘅良政善治，其中一個內部監督就係財務控制，今日香港成功大企業及公營機構，全部都係靠財務控制，遏止管理層建功立業，四出收購之個人野心。梁粉政府繼承董建華「大頭症」，務虛浮誇，一味要搞大項目大規劃，要名垂青史，當年董氏傑作Cyberport，得閒大家去睇吓，靜到耳鳴，外籍細路在寫字樓公共地方踩板都仲得，本地專業、中產除咗去附近間酒店偷情，都唔知去嚟做乜。
鬍鬚曾落閘，當然一邊比林奮強砌，另一邊比何喜華班人砌，上下一齊夾擊，話政府大把錢，冇理由落閘。鬍鬚曾要阻止梁振英亂派，自然會用最保守嘅估算，睇淡將來收入。
正如庫務局常秘謝曼儀所講，唔係唔俾派，不過以後要從長計議。換句話講，即係唔該守規矩，定出優先次序、提供合理理據、諗通執行細節、做好財務影響評估，最重要係要從成盤數去睇，你用六十億去搞老人津貼，其他福利項目自然冇得再派！「成熟一項推一項」此等亂搞非理性決策，不應再出現！
有一眾無能之人為政府辦事，自然未見其利，先見其弊！
添馬男