上世紀九十年代，左丁山係紐約CPJ嘅會員，會員咭放在荷包裏面，以便不時之需。CPJ即是Committee to Protect Journalists（保護記者委員會），上星期在CPJ網站之News Alert就有劉進圖嘅圖片，標題係"Former Hong Kong Editor in Critical Condition after Attack"，簡短內容係CPJ譴責襲擊事件，呼籲當局詳盡調查，將歹徒繩之於法。
世界各地發生記者遇襲之事，幾乎無日無之，料不到今次發生在香港，CPJ網頁顯示在2014年已有四名記者遇害，自1992以來共1044名記者被殺，615名被冷血謀殺，2013年有211名記者坐牢。
做記者係危險工作，相信好多新聞系學生入學時始料所不及，不過大部份遇害、殺害記者嘅事情係在落後國家發生，先進國家就比較罕有，因為叫做先進咯喎，自然懂得使用「合法」手段，逼使新聞機構就範及聽話，例如史諾登爆料，令美國NSA、英國GCHQ如何偷聽傳媒電話，監察記者及普通人民通訊之事，大白於天下，日本就沿用日本傳統，由政府發功，最近逼迫日本放送協會（NHK）全部十位理事簽下日子留白辭職信，等理事長籾井勝人（即係亂講慰安婦並非日本獨有嗰位）可以全權話晒事。佢有乜大把炮？咪係首相安倍晉三馬前卒囉。
前《明報》副總編輯，離職已久嘅阮紀宏在佢嘅「明報專欄」（二月二十六日）寫香港新聞業有史以來最自由，內有提及1960年代安妮公主訪港，《明報》一條標題：「打砲廿一響，送御妹過海」，此事在報壇流傳已久，左丁山睇完阮紀宏大文，向有關人士查證，阮先生記錯咗嘞，瑪嘉烈公主在1966年三月一日訪港，飛機在啟德機場降落，再坐慕蓮夫人號過海到港島皇后碼頭，海軍軍艦鳴響禮炮致敬，翌日《明報》新聞版就出現上述標題，「創意人」就係年青港聞版編輯韓中旋。標題出現後，華民政務司與查良鏞有溝通，查先生「撤換編輯」，將韓調往出版部，人工稿費不變，韓醒目到極，「體會老闆苦心」，自動辭職而去，轉到其他報紙，後來成為《成報》總編輯，享譽本地報壇，現已退隱享福咯。