近年有好多分析員郁動嘅消息，部份過檔另一間證券行，個別就「上岸」去咗上市公司或準備上市嘅公司幫手。據聞，有「細價股揀股王」之稱嘅劉紹文（Kenny）前日亦離開咗工作近十年嘅瑞信。
Kenny嘅離開雖然有些少突然，不過呢行嘅特色就係話走就走。佢早於2004年加入瑞信，工作近十年，原先主要睇細價股，因此有「細價股揀股王」之稱，舊年開始睇埋博彩股。
擁「ANALYST」自訂車牌
佢為人十分友善，不會因為外資行背景而冷待傳媒，仲不時跟傳媒交流對市場嘅睇法，喺行內具有一定知名度。Kenny加入瑞信前，有三、四年喺里昂工作，一年一度嘅里昂風水指數，佢都曾經粉墨登場做推介㗎。最特別係，佢有個「ANALYST」車牌，一駛部車出街，係人都知佢做邊行。
查實近年瑞信研究部都有唔少資深分析員相繼離開，舉例，睇開科技股嘅張永恒（Wallace），被阿里巴巴老闆馬雲睇中，去咗做投資關係部（IR）主管。入行逾廿年、睇地產股嘅梁啟棠（Cusson），舊年底過檔摩根大通。原本睇賭股嘅陳偉邦（Gabriel）舊年亦去咗法巴。
早啲嘅話，仲有行內睇零售股出晒名嘅資深阿姐Marisa Ho，佢2010年離開瑞信後，加入「名牌潘」潘廸生旗下廸生創建（113）做集團總經理，各位分析員都搵到更好地方發揮，劉紹文都唔會例外嘅。
李華華
mailto:[email protected]