「要不是大陸，香港早就完蛋了？我哋唔係咁認為囉！」就係憑住呢個信念，一班八十後製作咗一段叫做《香港將於33年後毀滅》嘅短片，講述殞石會係2046年擊中香港，幻想北京用直升機吊走ifc國金大樓等地標「撤資」、後生仔將西隧變身高能量炮誓要拯救呢個小島，唔少網民睇完都好有共鳴。呢段短片原來係首富李超人有份間接資助㖭呀！
33年後香港玩完？咪即係2047、50年不變嘅大限？條片政治隱喻相當明顯啦。故事一開波，就話國家氣象局發現一顆小行星，將會喺2046年擊中香港，人人諗住走佬，三分二港人選擇離開，解放軍用直升機吊走中環嘅商業大廈、機場俾人移植咗去珠三角，但估唔到冇咗大財團、股市、地產霸權、自由行，香港唔再逼爆；樓價跌到每人可買兩個單位；舊機場喺九龍城重生；長毛做咗立法會主席，三個月內搞掂咗真普選……
留守喺香港嘅男主角，仲加入咗政府成立嘅科技局，用咗本來用嚟起天價高鐵嘅撥款，研製出高能量炮，摧毀小行星咁話。高能量炮係用西隧改裝，都幾科幻吓㗎。
李超人間接資助
呢段短片想帶出「除了逃避，其實仍有選擇勇敢面對的自由」嘅訊息，上載YouTube兩日已有逾4萬人睇過。導演吳兆麟話，片中最後一段，係希望表達冇中央干預，香港可以活得好好、「玩得仲耐」。短片係M21香港有「價」短片資助計劃入圍作品。呢個資助計劃，係由香港青年協會主辦，獲李嘉誠基金會「Love Ideas, Love HK集思公益計劃」資助。咁換言之，首富李超人間接係幕後金主，有份促成好事啦！
李八方
mailto:[email protected]
