仲有99日就到世盃，唔少國家隊已經公佈咗佢哋嘅世盃戰衣，其中意大利就喺周一開記招，推出新波衫。隊長保方同前鋒巴洛迪利都話件衫設計得靚，着落仲好舒服㖭。
同𠵱家着開嗰件唔同，意大利呢件主場波衫有條藍色嘅領，心口仲會有3粒鈕；兩邊腰位各有條白線，袖口位就有意大利國旗3色。保方大讚呢個系列嘅波衫設計得好，「呢款新球衣令我印象深刻，設計有好濃厚嘅意大利感覺。呢件衫可以幫助我哋發揮最高嘅水準，而且摸落件衫感覺好好。」巴洛迪利就話：「意大利國家隊將會面對好大嘅挑戰，我哋已經準備好代表國家比賽，目標係要令國民感到驕傲。波衫代表住球迷嘅支持、信念同埋熱情，激勵我哋戰鬥，等我哋可以踢出最好嘅表現。」諗諗吓，有時設計波衫真係幾好做，前兩年嗰件意大利波衫係白領，舊年就變V領，今年變番有領加多幾粒鈕就係新款。但佢哋件作客球衣就完全唔同樣，一來主色係白色配灰線，二來冇領又冇鈕，風格唔多連貫喎。
只不過同荷蘭比，意大利嘅設計已經好有誠意。荷蘭件世盃波衫嘅設計，好聽啲係叫簡約，難聽啲似係入去小畫家然後㩒填滿橙色就搞掂。成件波衫基本上用一隻字就講得晒，就係個「橙」字；純粹一件全橙色嘅V領衫，再加隊徽同贊助商嘅標誌。