林峯有「廈門李嘉誠」老竇，喺《大鬧天宮》演哪吒嘅鄭家星都有個「東莞何鴻燊」老竇鄭強輝。鄭強輝係東莞首富，坐擁400億資產，係廣東黃河集團董事，主要做汽車製造、電子產業同酒店業務，近年因為個仔鄭家星想做藝人，所以染指娛樂事業。
鍾意唱歌做戲
2008年鄭強輝開始投資電影，有黃百鳴嘅《葉問》系列、楊采妮嘅《浮城》，仲有最近嘅《西遊記之大鬧天宮》，𠵱家佢索性做埋東方電影公司主席。老竇投資幾千萬開戲，世叔伯知道鄭家星鍾意唱歌同做戲，點會唔預埋佢一份呢！佢喺《葉問》做過任達華個仔，《大鬧天宮》做哪吒，仲唱埋《大鬧天宮》主題曲。眨眼鄭家星入行4年，老竇有米又點會唔開戲畀個仔做主角？鄭家星前日接受訪問時話：「我都知差唔多時候，想有個好劇本先拍，首選拍愛情片，至於女主角，我鍾意舒淇，如果真係要搞，度埋期，應該都係出年先可以開，愛情片我諗5千萬差唔多！」
撰文：馮仁昭
