騰訊（700）隻企鵝鍾意飲王老吉？巴西世界盃仲有三個多月就到，呢段時間又係各大企業搵位賣廣告的黃金檔期。噚日就有內地網站傳出，白雲山（874）旗下涼茶王老吉同騰訊成為「戰略合作夥伴」，今日仲喺北京舉行「騰訊世界盃衝刺計劃發佈會暨王老吉戰略合作簽約儀式」。
騰訊舊年宣佈，獲得巴西世界盃視頻直播同點播權益，用戶可透過不同渠道睇到全部64場比賽。王老吉跟騰訊有合作，提供贊助之類不足為奇，但上述一堆名堂實在誇張，投資者卻唔理咁多，唔敢追騰訊，就買入同騰訊有關嘅股份，刺激白雲山噚日大升15%。
有騰訊員工透露，今次成件事由王老吉主導，騰訊冇乜點參與。話說回來，世界盃嘅中港開波時間由凌晨至朝早都有，捱夜睇波，配埋「睇波三寶」汽水、薯片同花生，可能真係要飲涼茶清熱。