2011年接火棒做八達通CEO嘅張耀堂（Sunny），本月21號就last day，正式退休去。由賓架時期忙到八達通，Sunny話退休後冇乜特別計劃，暫時只計劃6月跟一班退休朋友一齊去參加郵輪旅遊，去邊都仲未知，一切都交晒畀老婆大人決定。
Sunny噚日跟傳媒飯聚，問佢會否好似恒生（011）前一姐梁高美懿，退休一段時間之後重出江湖，𠵱家做創銀（1111）副主席。Sunny就話，最多只會做兼職，要「唔使喺公司坐足一日」。
年屆60歲嘅Sunny本來今年1月退休，因接任人選未定，所以順延至今個月拜拜。Sunny冇再延期，想必八達通大股東港鐵（066）已經搵到新CEO，可惜Sunny貫徹口密作風，唔肯透露半句，但佢緊守崗位，力sell八達通未來大計，好似手機P2P支付同網上支付等。