由前傳媒人岑蘊華同吳婉君主理嘅TC2 cafe，自從喺砵蘭街搬咗去太子柏樹街後，地方雖然冇咁就腳，但係個舖位大咗，加上維持開到深夜，生意反而好咗。香港地租金貴、食材價格係咁升，最好就梗係可以年終無休24小時做生意啦，不過請人難，啲客係咁嚟，雙拳難敵四手，TC2噚日都要抱歉宣佈，「迫不得已」決定每月休息兩天。
佢哋話呢，都好理解客人一旦摸門釘，會相當沮喪。但飲食業人手短缺，佢哋開業以嚟，未試過有一日係夠人做嘢，老闆其實同時係一位全職水吧仔。前年特首選舉當日，佢哋為咗去會展抗議小圈子選舉，舖頭因為唔夠人，仲要落閘休息半天！老闆話，大鐵人廚師阿欣，由砵蘭街打拼到太子，從來冇埋怨假期唔夠，日做十幾粒鐘，但係今天，佢終於累了。所以佢哋由3月起，每個月第二個同第四個周一，都會關門休息，希望大家到時唔好摸門釘啦。