卸任在即嘅港大校長徐立之，雖然喺8.18事件後聲名狼藉，不過睇在佢服務港大12年嘅份上，冇功都有勞，港大學生會同港大校友會等六個組織，將會喺3月16日（周日）舉行一個簡單而唔隆重嘅歡送會，名為「立之，珍重！」。歡送會喺陸佑堂舉行，dress code係要有港大元素同style，即係點？自己諗喇。主辦單位話，成個歡送會一切從簡，連致辭都慳番，只會有一個15分鐘嘅簡單儀式，然後就係合照時間。徐立之會喺今個月底正式離任，暫時未知去向。接任嘅馬斐森將會喺4月1日愚人節履新，佢未上任已經招來「三無」批評，八方都想同候任校長講聲：「阿森，珍重！」