大部份港區政協委員非富則貴，梗係貴人事忙，未必開得齊所有政協會議；但新一屆中央領導層對佢哋考勤紀錄真係好上心㗎，噚日中聯辦副主任殷曉靜連走兩場政協小組會，就發炮話港區政協委員出席率偏低，仲以兩會前喺珠海搞嘅兩會預備會為例指，百幾個港區政協委員，竟然只得50零個出席，好失望咁話，提醒政協要好好安排日程，盡量出席會議。原來嗰個預備會，中央請到財政部部長樓繼偉出席，最後咁少政協捧場，難怪中央咁嬲嘅。
據聞殷曉靜席間仲話，港區人大代表出席率就好好嘞，而政協會期已經縮短到九日，呼籲委員盡量唔好請假。據聞其中一場小組會上，有委員直接向召集人陳永棋交請假信，話期間要返一返香港開會，仲附局長信件作實，棋哥笑笑口話，可能要特首代寫嘅請假信先至得嘞。