新地（016）上周五突然宣佈派發俗稱「紅輪」嘅紅利認股權證，最多可伸手問股東攞222億元。新地現時負債比率雖然唔算高，不過未來息口趨升，再加上本地建築工人唔夠、銷售規管等措施，都會令發展商「砸錢」時間長咗，周轉無咁快。喺咁嘅考慮之下，股本融資可能對新地來講，都係一個較好的選擇。而郭氏家族現時只持有新地約四成多權益，佢哋肯定唔想用現時呢個價（NAV折讓是歷史偏高水平）去配股，攤薄自己股權。所以集團今次選擇喺23年後再發紅輪，道理似乎係講得通嘅。
不過，海迪嘅芬佬朋友，就對新地發紅輪有多一層解讀。佢形容，新地今次12派1呢個分發基準好「騎呢」，基本上會供到散晒，有啲迫老散唔要之嫌。由於紅輪有一定行使年期，有時間值，所以隻紅輪喺初期，一般都可以在市場以premium價格賣出去。如果老散唔想供紅輪，可以趁早賣咗佢套現，彌補一啲被攤薄嘅損失。咁相對而言，大股東就有空間，喺未來大半年內以相對穩定價格，大手增持新地股份。
另一個芬佬提出嘅疑點，就係timing問題。郭氏三兄弟剛剛才達成家族和解協議，無幾耐就話要發紅輪，是否有人想攤薄其他股東？又或者鞏固自己嘅勢力？還是這是大家先協議好、一個較為體面嘅下台階？畢竟三兄弟在新地股權上仍各自有相當影響力，長遠而言，這不會是一個平衡嘅狀態。
海迪