所謂「新官上任三把火」，微軟新任CEO納德拉（Satya Nadella）上場一個月，就有傳兩名高層要走，其中副行政總裁貝茨（Tony Bates），之前更係接替鮑爾默做CEO嘅人選之一。
貝茨係當年微軟收購通訊軟件Skype時加入微軟，有傳佢本來係CEO大熱人選。雖然結果俾納德拉做咗CEO，但科技新聞網站Recode八到，話佢皇帝女唔憂嫁，好多人想請佢掌舵，例如可穿戴相機製造商GoPro。
另一位副行政總裁瑞勒亦會離開微軟，佢係微軟Windows部門嘅營銷總監兼財務總監，2001年加入微軟，舊年7月先升職。
有人走自然就有人升職，納德拉委任副行政總裁Mark Penn擔任策略總監，佢曾經為美國前總統克林頓同英國前首相貝理雅工作，做開政治方面嘅工作，加入微軟後就負責廣告部。