男歡女愛嘅嘢，離離合合本來好平常，但做到再見亦是朋友都唔容易，仲不時見到男方飛完女方後𡁻完唱㖭；不過，NBA活塞中鋒杜蒙特（Andre Drummond），堂堂6呎10吋大男人，今次反而成為𡁻完唱受害人，俾前歌星女友Jennette McCurdy大爆瘀事，話佢接吻技巧欠佳喎。
20歲嘅杜蒙特，雖然所效力嘅活塞仍然只屬東岸中下游球隊，不過佢都算得上NBA內線潛質新星；上月喺明星賽新秀對抗賽，佢仲拎埋MVP，點知就發生獎座一分為二嘅瘀事。最慘係杜蒙特嘅瘀事不但發生喺球場上，仲喺情場上；上年夏天佢追到索女歌手Jennette McCurdy，點知拍咗拖幾個月就分手，Jennette日前仲喺電台大爆杜蒙特嘅拍拖瘀事。
企凳仔先錫得掂
原來杜蒙特同Jennette拍拖，全靠Twitter呢個社交網站。Jennette自爆杜蒙特連續幾星期喺Twitter嘅Woman Crush Wednesday加佢，令佢留意到呢位籃球員；之後兩人喺Twitter互相留言，最後仲約出嚟食晚飯。第一次約會兩人已經咀嘴，但身高太懸殊，杜蒙特差唔多7呎，Jennette只得5呎2吋，電燈柱掛老鼠箱，搞到Jennette要企上張凳仔先可以咀嘴。
情場初哥太認真即被飛
拍拖經驗老到嘅Jennette仲大爆杜蒙特接吻技巧差，嘴形又唔舒服，搞到佢冇Feel；而且杜蒙特好似情場初哥咁，兩人一齊幾個月，杜蒙特已經認真到買埋鑽石鏈，單膝下跪向佢求婚。雖然當時Jennette感動得滯應承咗，但返屋企諗深一層，覺得同杜蒙特唔可以長久，幾日後拒婚之餘仲分埋手㖭。
其實咁多NBA球員神高神大，搵女友都好傷腦筋，好似3百幾磅嘅名宿奧尼爾咁，同5呎2吋嘅前女友妮高阿歷山大周街晒恩愛，成日都俾球迷笑。一係好似雷霆前鋒杜蘭特咁，搵個效力WNBA山貓後衞嘅未婚妻蒙妮卡，身高成5呎10吋，咁就門當戶對得多喇。
