內地知名賓架方風雷旗下私募基金厚樸投資（Hopu）2010年忽然話要淡出私募市場，近年又回勇。外電引述消息人士透露，厚樸舊年進行首輪集資，截至11月籌到12億美元（93.6億港元），希望今年上半年再籌4億美元（31.2億港元），合共125億元。如此規模，真係買乜都得。
方風雷曾經喺中金同埋中銀國際工作，喺投行界相當有江湖地位，後來擔任高盛高華董事長，又係厚樸創辦人。
厚樸最近開始活躍番投資，上月跟中銀集團等機構組成財團，向新加坡倉儲物流行業巨頭普洛斯旗下普洛斯中國注資23.5億美元，入股34%。舊年底又向蒙牛乳業（2319）買入雅士利（1230）股份。𠵱家籌到咁多錢，肯定仲有好多搞作。