問心講，LINE嗰幾隻公仔的確幾得意，屋企間房已幾乎變熊大、兔兔主題。不過，無論佢哋幾可愛都好，為免無朋友，菲菲都唔會由WhatsApp轉會LINE，正如內地網民都唔會咁輕易由微信轉會一樣。
不過，LINE於內地嘅前景近來出現轉機。先靠《來自星星的你》植入式廣告而人氣急升，於上星期四大結局當日，更舉行結局公投活動，令LINE成為App Store最高下載量第9名。另外，熱傳阿里將拍住軟銀入股LINE，如果成事，以阿里咁肯掟錢同騰訊砌過嘅作風，LINE理應可以喺中國有少少作為。
講開阿里，佢嘅淘寶搞到實體百貨業苦不堪言，不過識得與時並進搞O2O總會大有人在。銀泰（1833）除咗有自家電商銀泰網外，由於主席沈國軍同馬雲一向係好拍檔，早前合作搞菜鳥網絡。上年銀泰已開展支付寶付費服務，今年「手機淘寶3.8生活節」，佢哋又再合作「造節」。銀泰股價近日突破降軌，現水平可吸納。
上星期推隻舜宇光學（2382）係Google概念股，今個星期想先提一提隻富智康（2038）。小米手機繼續大賣，當通達（698）接連破頂，手上都有小米定單嘅富智康冇理由冇得轉勢；加埋Sony、BlackBerry、亞馬遜都計劃出機，富智康唔愁無生意。
Fifi
本欄逢周二、四刊出