《福布斯》最新公佈亞洲區12位具權力女性嘅留意名單，佢哋都係廿歲尾、三十歲頭，本港上市公司有兩位太子女入榜，包括帝盛酒店（2266）總裁邱詠筠（Winnie），同埋內房股合生創展（754）太子女朱桔榕。
33歲Winnie出名係靚女，阿爸係遠東發展（035）主席邱達昌，曾經跟前特首曾蔭權阿仔曾慶淳拍拖，最近未有新戀情消息。
佢相當積極發展帝盛，每次接受傳媒訪問都有紋有路，滿肚大計，計劃透過簽訂酒店管理合約、買地起酒店、改建酒店等方式，增加經營嘅客房數目。
合生太子女朱桔榕就更加年輕，只得26歲，四、五年前加入公司做總裁助理，舊年年中升做副主席，似係鋪路接班，不過隨即傳出有多名高層集體辭職，公司之後作出反駁，呢件事冇乜下文，但可以肯定嘅係，朱小姐已經在港置業，仲要係買豪宅。
根據上月土地註冊處資料顯示，合生主席朱孟依嘅家族成員斥資超過1.76億元，購入嘉里（683）跑馬地紀雲峰四個單位，登記買家包括朱桔榕。