當年留學花旗國大學最後一年，香港被解放冇耐，我去咗加州探一個畢業出來做緊嘢嘅師兄，因為冇車，佢日頭返工時我就焗喺佢同幾個人一齊租嘅屋裏面，間屋每個人間房都有書櫃，某日我自取咗彭定康寫嘅書睇，記得我瞓咗喺我嗰張床兼全屋唯一張沙發上就開始煲嗰本書。到今日，我仲記得本書裏面其中一個point，就係喺國家領導人嘅inbox裏，任何關於香港嘅事，都係非常次要，數頭100項中央政治局常委會關心嘅都冇香港份。點解？彭定康話理由係香港相對國泰民安，由北京地下水抽乾到昆明火車站大屠殺可能引發各地種族報復活動，對國家領導全部都比香港發生嘅任何事更緊迫。
確保市場成功運作
問題係，我哋香港人嘅感覺係所有香港嘅事都會直達天庭，中央或北京嘅意向係一個最高領導，經過多番討論、深思熟慮後嘅monolithic決定。但當如果用邏輯推斷，都明中央最高領導冇能力直接關心咁多香港嘅事，咁究竟係邊個幫中央或北京，決定緊香港當係神主意般嘅意向呢？
任何做過大小機構嘅人都知，當某啲決定權跌到落中級管理層時，會有好多唔以長遠大局為重嘅決定衍生出來。香港其實係咪俾一班中央中級管理層舞緊呢？不過最大問題係，香港唔係一個鄉下小鎮，香港係一個每日段千億計金錢軱轕嘅地方。當咁多利益同錢喺香港空中盤旋，又要有一班我哋覺得係代表緊最高領導，但有可能最高領導又睇唔實嘅中級管理層，香港會點？
我真係唔知佢哋可唔可以kill us all，我哋有嘅武器只不過係筆同墨水。不過我哋呢個概念嘅原意係證明中國人本身可以點，資訊能自由流通先至可以令財經市場成功運作，資金分配有效，中國富強到不受外國入侵或干擾。
如果連香港呢個試點嘅資訊流通都不保，中國主權的未來會點？
孫柏文
獨立股評人
http://facebook.com/shuen
本欄逢周二刊出